بقالي كام يوم عايزة اكتب..انا عارفة الوقت اللي بتلح عليا الكتابة في المدونة كويس، ودايما بتبقى جاية من شعور متطرف يا بالانبساط يا بالحزن يا بالغرابة.. انا دلوقتي حاسة بالغرابة.. مقدرش امسك حاجة مضايقاني او معصباني بس متضايقة ومتعصبة..
الموضوع ابتدا بسلسلة احلام غريبة مالهاش اي دلالة غالبا بس غيرت مزاجي تماما، وبعدين هبت على دماغي افكار وجودية مقطوعة كده وتساؤلات مالهاش سبب واضح..
ما ينفعش اقول اني حاسة بملل ومعنديش اصلا منطق لاني احس بملل لان الحاجات اللي المفروض اعملها على مدار اليوم محتاجة اسبوع.. بس كل ده مش مهم.. المهم هو النغزة اللي بتيجي في القلب والسحبة اللي بتيجي في الروح، الموضوع ده اتكرر على مدار الايام اللي فاتت بشكل مش مفهوم ومش منطقي...
النتيجة اني بفرك زي النحلة يمكن اغلوش، مش عايزة اقعد لوحدي، مش عايزة اسيب نفسي لدماغي او قلبي او روحي يفشخوني كده.. وكل محاولاتي اني اطلع من نافوخي بتنجح مؤقتا بس..عندي احساس بتاع ان في حاجة كبيرة هتحصل! وده الحقيقة مخوفني.. ومخوفني كمان ان مفيش حاجة تحصل!
هو مش ملل زي ما اصحابي القريبين بيفسروه.. المشكلة اني كمان معنديش تبرير منطقي لحالتي، فلما بيقولولي ملل بقولهم آه وانا عارفة انه مش الملل.
عندي رغبة في التعبير عن كل مشاعري الغضبانة والمحبة والملانة والمبضونة والمفشوخة من غير اي تفكير ولا اعتبارات، ولحد دلوقتي اللي بيطلع غضب وزعيق في اي حد يهوب ناحيتي ويضايقني!
بس من يومين عيطت من غير سبب لما واحد صاحبي سألني انتي كويسة؟!! لأ انا مش كويسة واللي مزعلني اكتر اني حاسة اني عاملة زي العيل الصغير اللي بيعيط وبيزن على حاجة بس هو مش فاهم ولا واعي لسة هي ايه؟! ولا قادر ولا عارف يعبر عنها!!
الموضوع ابتدا بسلسلة احلام غريبة مالهاش اي دلالة غالبا بس غيرت مزاجي تماما، وبعدين هبت على دماغي افكار وجودية مقطوعة كده وتساؤلات مالهاش سبب واضح..
ما ينفعش اقول اني حاسة بملل ومعنديش اصلا منطق لاني احس بملل لان الحاجات اللي المفروض اعملها على مدار اليوم محتاجة اسبوع.. بس كل ده مش مهم.. المهم هو النغزة اللي بتيجي في القلب والسحبة اللي بتيجي في الروح، الموضوع ده اتكرر على مدار الايام اللي فاتت بشكل مش مفهوم ومش منطقي...
النتيجة اني بفرك زي النحلة يمكن اغلوش، مش عايزة اقعد لوحدي، مش عايزة اسيب نفسي لدماغي او قلبي او روحي يفشخوني كده.. وكل محاولاتي اني اطلع من نافوخي بتنجح مؤقتا بس..عندي احساس بتاع ان في حاجة كبيرة هتحصل! وده الحقيقة مخوفني.. ومخوفني كمان ان مفيش حاجة تحصل!
هو مش ملل زي ما اصحابي القريبين بيفسروه.. المشكلة اني كمان معنديش تبرير منطقي لحالتي، فلما بيقولولي ملل بقولهم آه وانا عارفة انه مش الملل.
عندي رغبة في التعبير عن كل مشاعري الغضبانة والمحبة والملانة والمبضونة والمفشوخة من غير اي تفكير ولا اعتبارات، ولحد دلوقتي اللي بيطلع غضب وزعيق في اي حد يهوب ناحيتي ويضايقني!
بس من يومين عيطت من غير سبب لما واحد صاحبي سألني انتي كويسة؟!! لأ انا مش كويسة واللي مزعلني اكتر اني حاسة اني عاملة زي العيل الصغير اللي بيعيط وبيزن على حاجة بس هو مش فاهم ولا واعي لسة هي ايه؟! ولا قادر ولا عارف يعبر عنها!!
