والله كبرت يا يوسف ووشك اتنحت

بعدت المسافات بينا
المشهد الاول
عندي عشر سنين وهو يمكن اكتر من ضعف عمري
كان هو اللي يبوريني الدنيا كلها
زي ما كان بيعرفني ازاي احبها
دلوقتي الحاجز اللي نبت تحت وشه خلاه بعيد
يمكن الناس لما بتحب الدنيا قوي بتتصدم قوي
فبتكرهها من غير ما تحس

المشهد التاني
مش فاكرة اول مرة بطلت اسلم عليه السلام الحميمي اللي اتعودنا عليه
مش موقف ولا زعل بس تلاهي
والتلاهي احيانا بيبقى اخطر من المواقف والخناق
يمكن فكر في الموضوع او يمكن حتى ماخدش باله
بس انا خدت بالي بعد سنييين

لو عدينا الناس اللي وقعوا من غير ما نقصد
هنلاقيهم كتير ولو فكرنا شوية او كتير
مش هنفهم ايه اللي حصل

المشهد التالت
كنت باحب جملة"والله كبرت يا يوسف ووشك اتنحت"
لدرجة اني كنت باتمنى ان وشي يتنحت
ولما وشي اتنحت اتبرت معاه حاجات كتير
واتغيرت معاه حاجات اكتر
بس هم بيقولوا النحت بييجي من الالم
والالم بييجي من التجربة
اللي ما بيفضلش منها غير الالم
وده اللي بينحت الوشوش
فتحس في الاخر انك ماتعرفش الوش ده
وتنسى امتى بطلت تعرفه

برواز

طول الوقت كنت بدور على حاجة
كنت بركب صور على براويز
عمرهم ما ركبوا على بعض
معرفتش المشكلة في الصورة ولا في البرواز
خفت اعرف وقررت اني مش هاهتم

واحد صاحبي زمان قالي كتر البراويز اللي مش على المقاس
هيجرح الصورة ويبوظها
قررت اني اخبي الصورة ومعلقهاش
ومش مهم اصلا حد يشوفها
مع انها صورة عزيزة على قلبي
واحلى حاجة فيها انها كانت زمان بتنور كل ما بيقطع النور
بس انا نظري ضعف وبقيت بشوف طشاش
فقررت اني مش هاهتم

لغاية لما قالي في يوم
مش لازم تشوفي النور كفايه تحسي بدفاه
قالي ان نظري ممكن بشوية دفا يرجع تاني
اما الصورة فمع شوية اهتمام هترجع زي زمان
الغريبه انه قالي كل حاجة من غير ما يفتح بقه
ومن كام يوم فاتوا
جابلي برواز
فقررت اني اهتم

مجرد رائحة

مر وقت طويل على تلك المرة الاخيرة التي نفذت الي فيها تلك الرائحة
بالامس فقط امتلات رئتاي برائحة كنت قد اوشكت على نسيانها
بعد ان شاهدت فيلم العطر انتقل الي شعور بعدم قدرتي على تمييز الروائح
لم يكن الامر له علاقة بالفيلم
بل له علاقة بانه لم يكن هناك رائحة تستحق الانتباه
بالامس بدأ الربيع برياحه وروائحه
لا أحب الربيع
لكنني لا أعلم لماذا اضفى على ذلك الاحساس فور نفاذ رائحته الي
طاقة مبهجة و متفائلة دخلت الى قلبي
جعلتني فقط بالامس اعود للاستماع الى فريق الابا
واعود لاحلامي الشقية المجنونة
بل واعيد النظر في ذكريات كنت قد قررت الا اتذكرها مجددا
شكرا لهذه الرائحة التي اعادت الي بعض مما فقدته

يا عمي انا ماتغيرنا

في مراحل في حياتنا مبناخدش بالنا من نفسنا ومن اللي حوالينا
فجاة بنبص في مراية بعد سنين نلاقي الشخص الموجود ده مش هو نفسه
بتبقى في حاجات كتير وقعت منه وحاجات اكتر زادت عليه
بس يا ترى هو قادر يقيم اللي وقع واللي جه كويس
احيانا كتير بيبقى البني ادم فاقد القدرة على التقييم
ويلاقي نفسه مش عارف ايه اللي له قيمة واللي مالهوش
وايه اللي بيحبه وايه اللي مش بيحبه
بيقى متلخبط
الصحاب مبقوش صحاب
والقريبين بقوا بعاد والبعاد بقوا قريبين
من غير مانفهم ايه اللي حصل؟؟
وهو مين اللي اتغير فعلا احنا ولا هم
طول عمري كنت بخاف من اني اتغير وابقى حد تاني معرفهوش
بس يظهر انه دي طبيعة الناس انها تتغير
بس يا ترى انا اتغيرت لدرجة ان كل الحاجات دي تروح؟؟؟

مصر زي ما جابت رجاله جابت ايضا عيال

على رأي عم رضا القهوجي اللي قال في ساعة تجلي"مصر زي ما جابت رجالة....جابت ايضا عيال"
واسوا حاجة في الدنيا ان الواحد يعرف"عيال"لانه اللي بيلعب مع العيال ما بيخلاش من ال...........
العيل:هو من لا يتحمل اي مسئولية تجاه الاخرين,هو اناني,معندهوش فكرة عن حاجة اسمها التواصل البشري اللي بيطور البنى ادمين,عنده قصور حاد في الفهم والتفكير,عمره ما بيعترف انه غلطان لانه طول الوفت شايف نفسه صح ومش مهم عنده اي حد في الدنيا,الاحساس المرتبط بالنضج وكده مش موجود
التعامل مع العيال:اجارك الله من التعامل مع العيال لانهم طول الوقت بيضايقوك, ما بتقدرش تاخد منهم موقف لانهم عيال يعني معندهمش كامل الاهلية,اوعى في وقت من الاوقات تتصور انهم ممكن يسدوا لو احتاجتلهم في اي وقت,هم اخرهم في اللعب والمراجيح والفرجة على فيلم كارتون وحتى ده لازم يكون بحذر
يللا ربنا يحفظنا من العيال وشر العيال

مصر بتاعة خالد يوسف.... مش هتقدر تغمض عينيك

لسة النهارده من سوء حظي اتفرج على فيلم للمبدع الفنان المخرج اللي عمل اللي محدش عمله وادمج الاخراج المسرحي مع الاخراج السينمائي في اسوا الاشكال الممكنه خالد يوسف و هي فوضى
حاتم السلطة القاهرة المستبدة التي تغتصب مصر لحد ما"تصفي دمها"ويبقى ورا وقدام وحاجة نيلة, ويقعد كده في مشهد من السيرك القومي بيعذب الناس لانه هو في الاصل عنده مشاكل نفسية وفي النهاية اللي ينقذ مصر من ايده ظابط تاني بس ايه بقى وكيل نيابة قد الدنيا امه وابوه اتعرفوا على بعض في مظاهرة واتجوزوا في المظاهرة اللي بعدها.شوف ازاي!!
ومصر بقى اللي الاستاذ خالد يوسف ما يعرفش حاجة عنها بتتفشخ بجد مش بس من سلطة سافلة لا ده من امثاله كمان اللي بيسطحوا الحاجات وبيعكوا الدنيا
امبارح في واحد زميلنا خطفته امن الدوله ومنعرفش عنه حاجة لغاية دلوقتي لانه متضامن مع غزة لانه قرر هو ومجموعة شباب انهم يعملوا حاجة رمزية وهي مسيرة الى اقرب نقطة من غزة للدعوى الى فك الحصار,لكن يبدو ان المسيرة دي شكلت خطورة حادة ومنفرجة على الامن القومي المصري مما دفعهم لخطف فيليب رزق المخرج ربما لانه ذهب الى غزة وارتكب الفحشاء حين صور معاناة الشعب الفلسطيني من العدوان الصهيوني
وبما ان اسرائيل دولة صديقة وفي بينا مصالح بالعبيط ما ينفعش الفعل ده يصدر من مواطن مصري
لا ده واحنا كمان زي ما بابا مبارك قال قدمنا تضحيااااااااااات وشهداااااااااء للقضية الفلسطينية
يعني لما حاربنا في 67 وفي 73 مكانش عشان سينا سينا ايه ؟!! ده كان عشان "فلسطين"
وبالتالي اي حد هيزايد على النظام يستاهل الحبس
خصوصا وانه النظام زي حاتم كده بالظبط عنده مشاكل نفسية لانه تم اغتصابه وهو صغير بس للاسف لسة بيغتصب
مكبوت يا حرام
مش بس فيليب
شباب كتير زي محمد عادل و احمد الكردي و ابو دومة وغيرهم مستقبلهم بيضيع لانهم بس بيقولوا رايهم
واحنا في حكم عسكري
ولازم نراعي قانون الطوارئ اللي انينا
ونبوس ايدينا وش وضهر عالرغيف الاسود ابو مسامير اللي بنص جنيه,وعلى كيلو اللحمة اللي بخمسين جنيه وعلى كل كارثة الحكومة بتهديهالنا من العبارة للدويقة وعالنوم عالرصيف وعالحياة اللي لونها كحلي على راي السندريللا
ومش مهم اللي يتخطف ولا يتحبس ولا يتحرق بجاز كله فدا بقاء النظام مشتعل من اجل حراسة الامن والامان والسلام والرفاهية للشعب المصري

كان عندي انسان غلباوي بنص لسان

اوقات كتير بفكر اني اتغيرت
زمان كنت حاسمة اكتر وكنت لما باخد قرار لازم انفذه
كنت اتريق عالناس اللي بتبقى شايفة الحاجات ومش قادره تاخد قرار
بس انا دلوقتي بقيت مش عارفة
يمكن بحب
والحب بيخلي الناس مش قادرة تشوف او مش عايزة تشوف
المشكلة لما تحب حد شايف بس مش فاهم
هنا بتحصل قفلة
والقفلة عايزة مفك
والمفك عند الكهربائي
والكهربائي ولع في قفلة بسبب فولت عالي
وبقت القفلات كتير ومحتاجة لشركة الكهربا
بس انا مش عارفة منين الطريق
وكل ده بسبب مسالة الشوفان
بس انا بشوف في النور وفي الضلمة كمان
لكن النور وحشني والضلمة كمان
ووحشني الانسان ابو نص لسان

في دار السلام

في السوق مر ذلك الرجل ذو التمانين خريفا بجواري صامتا يسير في المسيرة الحاشدة المنددة بالعدوان الصهيوني على شعب غزة,
بصوت خافت هزيل من تاثير ما فعله الدهر به طلب مني ان يرفع العلم لمدة خمس دقائق"عشان ولاد الكلب دول" حينها فقط لم اسمع صوت المتظاهرين سمعت فقط صوتا غاضبا قويا يحمل في الاعلى علم فلسطين المحتلة ,وحين نظرت في وجهه وجدت ذلك التعبير الذي جعلني لوهلة اشعر اننا في غزة نحارب احدى الدبابات الاسرائيلية لتحرير فلسطين!!!