الرسالة الاولى:
لصاحب فكرة بوسترات" 25 ابريل انتفاضة شعب" صنعتم انتفاضة مزيفة اسميتموها 25 ابريل بذكاء شديد لتنافس 25 يناير بالذاكرة الضعيفة لغالبية الشعب المصري لكن لن تفلحوا وأمك اسمها حنفي
الرسالة الثانية:
لمن ينادون بعودة عجلة الانتاج: كم منكم كان يقضي ساعات عمله بالعمل؟ كم منكم كان يعمل بالاساس؟ كم منكم كان يكفيه راتبه حتى يوم 10 منه .خلاص زانقكوا الشغل قوي وبقيتوا بتحبوه كلكوا فجأة
الرسالة الثالثة:
لمن يولولون بقلة الفلوس: لحظة واحدة، هي كانت فين الفلوس ؟ واكثر من 60% من المصريين كانوا تحت خط الفقر في نظام بيحاول يبقى رأسمالي اكثر من الرأسماليين الكبار
الرسالة الرابعة:
لبتوع الحقوني انا هاتسرق انا هاتخطف مفيش شرطة، مش عارف امشي في الشارع ولا خايف على بناتي يمشوا في الشارع: من امتى اسمالله كانت مصر بلد الامان كده، انا حقيقي بستغرب على خضة الناس لما بتحصل سرقة ولا بلطجة ولا حادثة اغتصاب وكأنه صفحات الحوادث في الجرايد كانت بتنزل بتهنئة يومية للشرطة على مجهوداتها الفظيعة في حفظ الامن
الرسالة الخامسة :
للمرعوبين من السلفيين والاخوان اللي ظهروا فجأة بردو: هناك في مصر اكثر من ३०० فرع لجمعيات اهلية اسلامية منتشرة في افقر الاماكن في المدن والقرى وبتشتغل على الدعوة السلفية لامؤاخذة اما الاخوان اللي بياخدوا اكتر من حجمهم طول الوقت هو احنا كنا عمينا عن انشطتهم الاقتصادية ولا عن تواجدهم الواسع في الشارع، والاهم من ده كله، هو احنا نزلنا في الثورة عشان البلد يحكها شخص او تيار بعينه؟؟؟ كانت بقت سهلة، حسب ما اذكر احنا نزلنا عشان الشعب يختار بالاغلبية يبقى لازم نحترم اللي الشعب يختاره
الرسالة السادسة:
للي بيقولوا الشعب جاهل وبينضحك عليه واحنا مش جاهزين للديمقراطية: انتوا ايه علاقتكوا بعمر سليمان؟؟؟ الشعب مش جاهل واللي بيستعلي نفسه على الناس هو اللي جاهل واذا كان الشعب محتاج لتوعية سياسية مش حاصلة والمفروض يقوم بيها الاحزاب فدي مش غلطتهم دي غلطة البهوات التوعويين لامؤاخذة وفي النهاية اذا حسبنا 16مليون قاموا بالثورة من الفئة العمرية المتوسطة اللي تقدر تنزل الشارع مع استبعاد الاطفال وكبار السن مش هاتبقى نسبة قليلة ابدا
الرسالة السابعة:
للمجلس العسكري ربنا حارسه وصاينه وكلنا جميعا للوطن ضحية: ادعو كل الناس انها تنتقد المجلس العسكري لانه مش سلطة الهية ولو كلنا انتقدناه هيبطل يحطلنا خطوط حمرا فيأما يعتقل الناس كلها، يأما يحط لنفسه خطوط حمرا ويتشطر عالمصايب اللي بيعملها من محاكمات عسكرية وكشف على عذرية المتظاهرات لاهانتهم ولاثبات الاشاعات اللي كانت بتتقال في التحرير انه المتظاهرين منحلين، صحيح احنا عارفين والجيش عارف كويس انه هيمسك بس في المرحلة الانتقالية بس ده مش معناه انه يقمعنا ويعمل فينا ويسوي وبعدين يوقلك مرحلة انتقالية، الشعب هو مصدر شرعية المجلس العسكري والشعب هو مصدر اي سلطة قادمة
وشكرا
جزيلا
جدا
