إيه احتمالية انك تبقى قاعد وتبص على الشباك تلاقي جودزيللا معدية من
جنب بيتكوا! أو إيه احتمالية انه وأنت قاعد طبق طاير يقع فوق سقف بيتك في الدور الأخير!
طب وإيه احتمال انه زرعة عندك في البيت تتضخم وتتحول لكائن بيتحرك ويهجم عليك!
طيب إيه احتمالية انك كنت تتولد في ألمانيا، اسبانيا، ايطاليا، أو أمريكا!
أو إيه احتمالية انك كنت تتولد في الصومال، أفغانستان، أو رواندا! أو احتمالية انك
كنت تتولد في ساحة حرب، فوق جبل، أو في غابة!
إيه احتمالية انك كنت تتولد في القرن الستاشر، أو الأربعينات! أو عصر
الديناصورات! وقد إيه احتمالية انك كنت تتولد في القرن الأربعين!
طب إيه احتمالية انك كنت تتولد طفل شارع! أو ابن أغنى رجل في العالم! أو
يمكن كنت تتولد ابن ساحر أو ابن رئيس جمهورية!
إيه احتمالية انك كنت تطلع دمك
ثقيل وشرير والناس بتكرهك! أو انك تبقى ملاك من السما أو انك تبقى كوميديان
ماحصلتش! أو انك تبقى شخص عادي! او شخص مميز جدا مخترع مثلا (بس مش الكفتة)!أو ممثل شهير جدا في هوليوود!
طب إيه احتمالية انك كنت تتولد كائن مش بني ادم حصان، شجرة، فرخة، أو
سمكة في محيط!
إيه احتمالية إن أحلامك تتحقق أو تتغير أو حتى ماتتحققش!
باختصار إيه احتمالية أي حاجة كان ممكن تحصل أو لسه هتحصل!
أنا بتخيل الحاجات دي وعكسها طول الوقت ومش بحس بالرضا أو بالسخط
على الدنيا! لا بفكر نفسي إن الدنيا أوسع من قدرتنا على الاستيعاب وكل
الاحتمالات الأسوأ أو الأحسن أو حتى العبيط والخيالي منها كان ممكن يحصل أو لسه
هيحصل :) :p
