هحتفل بعيد ميلادي ازاي من غيرك يا حوده...

اول عيد ميلاد ليه اتأخر فيه جدا على بيتنا واحتفل بيه في فلوكة ومامتي تكلمك تقولك كل سنة وانت طيب ومامتك تكلمني تقولي كل سنة وانت طيبة كان في 2007  فاكر يا حوده؟؟

 اكيد فاكر لانك كل ما كنت بتعرفني على حد من صحابك كنت بتقوله او بتقولها دي هدير صاحبتي اللي مولودة في نفس يوم عيد ميلادي..

فاكر الرسمة اللي رسمناها عالحيطة سوا بتاعة محمد وشتينا والعيال؟؟

طب فاكر اغنية بتناديني تاني ليه؟؟

فاكر اغاني المهرجانات اللي كنت دايما تشغلهالنا واقعد اتخانق معاك عشان تغيرها؟ 

فاكر لما ادتني الفودكا على انها ميه وتفتها كلها في وشك؟؟

فاكر كل حفلاتنا وقعداتنا سوا احنا واصحابنا؟؟

فاكر ازاي لما كنت بشوفك من اول الشارع كنت بجري عليك واتشعبط فيك زي العيال ونفرج الشارع كله علينا؟؟

جنان كتير عملته بتلقائية وانا في صحبتك يا صاحبي وكانت من اسعد لحظاتي ..

فاكر يا حوده اسكندرية ياما  مشينا فيها انا وانت ومحمد وتامر؟؟

وبيتكم الدافي اللي عرفتني فيه على احلى قمرتين في الدنيا وعلى احلى ام واحلى اب في الدنيا؟؟

لما قعدنا نرسم ونلون سوا..

فاكر يا حوده الفستان الاصفر الحلو اللي جبتهولي من فرنسا هو والحلق الابيض المدور المنقوش عجبوا كل اللي شافهم وكنت دايما بقولهم محمود صاحبي جابهملي بس انا مالحقتش اقولك الكلام ده ..

فاكر لما شفتك يوم 28 يناير في ميدان طلعت حرب وكنت اول صاحب قريب اشوفه يومها و بعدها علطول اقتحمنا الميدان؟؟

فاكر كل الاوقات اللي كنت انت موجود فيها يا حوده؟اللي هي كانت من احلى الاوقات في حياتي؟؟

انا عارفة انك فاكر زي مانا فاكرة مع ان الدنيا خدتنا من بعض..

مش محتاجة البس اسود ولا لبسته عشان عارفة قد ايه بتحب الالوان وانت اصلا صديقي صاحب الضل الملون لو مش في لبسك يبقى حواليك يبقى عينك اللي كانت تلقط الالوان الحلوة في كل حته يبقى رسوماتك يبقى الحاجات الحلوة اللي كنت بتحب دايما تعملها بايدك..عشان كده هافضل طول عمري لما البس حاجة ملونة او اشوف حاجة ملونة افتكرك يا صاحبي ..

انا اسفة اني قعدت شوية من غير ما اسال عليك ولا اشوفك..هتوحشني يا صاحبي..

انا اسفة يا حودة بس كنت عارفة انه لما هييجي يوم عيد ميلادنا لازم هتكون اول حد يكلمني ويقولي كل سنة وانت  طيبة وانا ارد عليك واقولك كل سنة واحنا طيبين..

هاحتفل ازاي يا حوده بعيد ميلادي كل سنة في سنين عمري وانت مش موجود؟؟!!

من حقي امشي في الشارع

من حقي انزل من بيتنا الصبح رايقة او متضايقة وامشي في الشارع مش شايلة هم عيل اهبل سخيف او حتى لطيف هيقرر يرمي كلمة تعكنن عليه....

من حقي امشي في الشارع وانا شايلة هم الشغل او الدراسة او الفلوس او اي حاجة ومايجيش واحد  ويقرر يطلع عقد نقصه عليه بمعاكسة سخيفة او بكلمة تحرش...

من حقي امشي في الشارع وانا متحققة في حياتي المهنية والخاصة وبفكر في مستقبلي مايجيش عيل تافه يتعامل معايا على اني شئ ماشي بثير غرايزه لمجرد اني بنت...

من حقي امشي في الشارع في مسيرة او مظاهرة او في اعتصام وبطالب بحقوقي وبحقوق غيري ومابقاش بتلفت حواليه خوفا من تحرش وسط الزحمة....

من حقي امشي في الشارع وانا لابسة الوان وماحسش بالذنب او بالخوف ان الالوان هتلفت نظر حيوان معدي فيقرر ييجي يضايقني والا البس سواد في سواد وتبقى عيشتي نكد....

من حقي  امشي في الشارع من غير ما في كل خطوة اتخانق وازعق واشتم والم الناس عشان اعلم واحد الادب وتروح طاقتي واعصابي في العبث ده بدل ما تروح في حاجات مفيدة....

 من حقي امشي في الشارع وانا زهقانة وبسمع مزيكا  وسرحانة في اي حاجة تخصني من غير خوف او قلق من عربية معدية او عيل رذل....

من حقي اجوع واكل في الشارع او اشرب عصير في الشارع او اكل ايس كريم في الشارع من غير ما حد يستظرف على امي وانا رايقة ومبسوطة...

من حقي وانا ماشية في الشارع  لو واحد ضايقني او اتحرش بيه اني اطلع عين امه واوديه القسم واشتمه حتى باوسخ الالفاظ لانه ماحترمش ابسط حقوقي وهي اني امشي في الشارع في حالي...

من حقي وانا ماشية في الشارع محدش يتعامل معايا على اني شئ بفطره في رمضان او بثيره مهما كنت لابسة لاني مواطن زيي زيه وعندي نفس المشاكل اللي عنده ونفس الهموم....

من حقي وانا ماشية في الشارع مايجيش عيل بريالة مبيفهمش يتصور انه داعية او مؤمن في نفسه كده ويشتم او حتى يقولي البس حجاب او البس ازاي لان دي حاجة تخص علاقتي انا لوحدي بربي...

من حقي امشي في الشارع  في الحر ده البس حاجات خفيفة وبنص كم وقصيرة على فكرة زي ما من حقك تلبس شورت

وتيشيرتات الوان ياما تلبس جلابية سوده بكم وساعتها ممكن اعمل زيك  ....

****

من حقي ماسمعش كلام تافه بتاع:

 اصل الشباب مكبوت، لا على فكرة والبنات مكبوتين بردو واذا كان الواد يعرف يتصرف مع عاهرات فعلى فكرة البنات ماتعرفش...

اصل الشباب مش لاقي شغل وظروفه صعبة، والبنات على فكرة مابيلاقوش شغل وبيقوا مطالبين يصرفوا على نفسهم او على عيلة وبتبقى ظروفهم صعبة...

اصل البنات بردو لابسة عريان وبتثير الغرائز، بالنسبة للشورتات والقميص المفتوح للصدر والبرفانات الحلوة دي مابتثيرش غرائز البنت ولا مش من حقها!!!!!

زي ما بتتفشخ في الشغل انا بتفشخ، زي ما بتفلس انا بفلس، زي مابتتحر انا بتحر، زي ما بتتبهدل في المواصلات انا بتبهدل، بجوع وبعطش وبتعصب وبشيل الهم بدري ، مافيش حد احسن من حد ومفيش حد اقل من يبقى نحترم نفسنا وكل واحد يخليه في حاله .......

 ****

انا مش شئ انا مواطنة زيي زيك ياروح امك منك له ومش حاجة زيادة كده عشان تيجي تطلع كل عقدك وسوادك وخراك عليها ولما ادافع عن نفسي تقولي مش محترمة وده ابسط حق من حقوقي اني امشي في الشارع  واني اعيش حياتي اللي هي اصلا فيها حلوها ووحشها من غير مايبقى التحرش والمعاكسة والسخافة هو الخراء اليومي لكل بنات وستات مصر ، بس انا بدافع وهدافع عن حقوقي بكل شراسة وبكل عنف مضطرة للأسف لاني في مجتمع مش بس ذكوري  ، ذكوري غبي ومعقد ومريض..

سلحفاة مائية والطريق الى العجوزة

منازل عدة اتنقل بينها كعادتي منذ الطفولة ولكن ما لم يكن معتادا تلك العلاقة الطيبة التي تجمعني بوالدي لدرجة تجعلني في حيرة ايهما اود المكوث معه من شدة التفاهم بيننا !!!بيوت لم امر بها قط ولكن اكثرها وضوحا كان منزل نيلي "عوامة" تشبه عوامات الكيت كات ، ولي بها غرفة بشرفة واسعة تطل على النيل مباشرة دون حواجز- واحد من احلام حياتي الكثيرة ان اسكن في عوامة، العوامة لابي ومن الواضح انه كان لدينا ضيوف، بسبب اصوات النقاشات المتعالية عن الثورة في الخارج، ويبدو أيضا انني تمسكت بعالمي الموازي الذي اختبئ فيه منذ اسابيع فذهبت الى غرفتي وتحديدا الى الشرفة.....
الشمس تنتصف السماء وتعكس آشعتها زرقة في المياه الصافية بغير المعتاد أيضا ، فجأة وفي عز تشكيلاتي للألوان من حولي أرى سلحفاة مائية كبيرة تبحر على سطح النيل وكأنها "لانش"  سريع وتحاول اللحاق بها سلحفاة أخرى صغيرة بسرعة  أقل.. تابعت السلحفتين حتى وصلتا الى الشاطئ المجاور لي وإذا بهما يتحولان الى رجل في ربيع العمر وطفل صغير ينظران الي ثم يوجه الرجل سؤالا لي بلهجة ريفية  عن مكان  مستشفى  العجوزة...أقف مذهولة كالعادة ولا أرد ..