سئمت الانتظار بدون امل

متعب قوي الانتظار من غير امل
لما رصيد الامل بيخلص بعد حروب كتير مع نفسك ومع اللي حواليك
متبقاش فعلا قادر تحاول تاني
وانا استنيت كتير حتى بعد الامل ما خلص

عارفة اني بلغي حاجة مهمة جدا من حياتي
بكل حاجة حلوة فيها وبتفاصيلها الكتير
خايفة ومرتبكة ومرعوبة من الندم

عمري ما كنت بخاف كده
وعمري ما ندمت على كل الحاجات الراديكالية اللي عملتها في حياتي
يمكن يكون لسة في امل عندك
بس هو خلص من عندي
بزق نفسي بصعوبة عشان اخرج من الساقية دي
اللي بتلف حوالين نفسها من تلات سنين
بزق نفسي عشان ارجع
وبزق نفسي بعيد عنك عشان بحبك

في الانتظار خسرت حاجات كتير وحشتني
خسرت جناني واندفاعي حبي للتجربة وخسرت الامل
واعذرني اني مش مصدقة
واعذرني اني عايزة ارجعني من تاني
وحشتني طاقتي اللي كانت بتكفي كل اللي بحبهم واللي حتى مابعرفهمش
كبرت وفي حاجات راحت مني وانا باخد من رصيد الامل اللي جوايا

مبقتش قادرة ادعمك في محاولة تانية
ولا حتى استقبل منك اي تعويض
مقدرة المحاولة والحب
وعمري ماهاقدر اكرهك في وقت من الاوقات

هتفضل موجود في مكان مميز جدا في قلبي
بس لاني بحبني قد ما بحبك
مبقاش ينفع رجوع
بقيت محتاجة ابص قدامي مش ورايا
حبة الطاقة اللي فاضلين عندي
محتاجاهم لنفسي
وانت للاسف مش هاتقدر تدعمني في الموضوع ده
عشان كده يا حبيبي هي دي النقطة اللي لازم نفترق فيها
عشان تفضل الذكرى الجميلة والمميزة في ذاكرتنا
يمكن تدعمنا قدام في حياتنا
بس بلاش نرجع بيها لورا

صدقني لحد دلوقتي مش عارفة ده صح ولا غلط
بس هو ده اللي انا حاساه بقوة
وهو ده اللي لازم اعمله