بداية جديدة

من وقت ما الثورة بدات وانا بتحصلي حاجات لطيفة جدا
بعد ما خلصت المشروع البحثي اللي كنت بشتغل فيه في اواخر 2010
كنت بادور على شغل وفي يوم 4 فبراير في عز الاعتصام والبهدلة في الشوارع
جالي شغل الشروق ودي كانت اول حاجة الثورة تديهاني على الرغم من البهدلة
اللي كنت باشوفها مابين الشغل والميدان
ودي كانت البداية الجديدة الاولى

في يناير كنت بدور على شقة جديدة لانه البيت اللي كنا ساكنين فيه اصبح لا يحتمل
فقعدت انا وليلى ندور وكنا حاسين باحباط لانه وقت الثورة قلنا مش هنلاقي حاجة
وشفنا حاجات كتير بس مكانتش كويسة
ولاننا دبسنا نفسنا ومجددناش العقد مع الست صاحبة البيت الله يحرقها
كان لازم نمشي
ولقينا البيت اللي فيه جيران بيعزفوا بيانو
اللي حسسنا اول ما شفناه وكاننا اتربينا فيه واحنا صغيرين
زي بيوت جدودنا كده قديم وبسقف عالي
وجنبه مكان لجنينة صغيرة
صحيح لسة مازرعناهاش
بس هانزرعها
ونقلنا في عز حظر التجول
ودي كانت البداية الجديدة التانية


اما البداية الجديدة التالتة اللي لسة بتبتدي انه
خلاص بعد اكتئاب وفرح وزعل وحب وزعيق وعشرة ونرفزة وكل الحاجات
قررت انا المسجل ادناه اني ابدأ بداية جديدة تماما واقفل صفحة مهمة من حياتي
مع كل الحاجات الحلوة و الوحشة اللي عدت ولازم تعدي بس كانت مهمة
وهتفضل مهمة هخبيهم في الدرج واقفل عليهم
وابص لقدام :))
عشان اكيد الدنيا لسة مخبية حاجات حلوة كتير
لانها فاجاتني بحاجات حلوة قبل كده
وانا عارفة انه عمرها ماخلفت وعدها مهما بتتاخر :)))