هحتفل بعيد ميلادي ازاي من غيرك يا حوده...

اول عيد ميلاد ليه اتأخر فيه جدا على بيتنا واحتفل بيه في فلوكة ومامتي تكلمك تقولك كل سنة وانت طيب ومامتك تكلمني تقولي كل سنة وانت طيبة كان في 2007  فاكر يا حوده؟؟

 اكيد فاكر لانك كل ما كنت بتعرفني على حد من صحابك كنت بتقوله او بتقولها دي هدير صاحبتي اللي مولودة في نفس يوم عيد ميلادي..

فاكر الرسمة اللي رسمناها عالحيطة سوا بتاعة محمد وشتينا والعيال؟؟

طب فاكر اغنية بتناديني تاني ليه؟؟

فاكر اغاني المهرجانات اللي كنت دايما تشغلهالنا واقعد اتخانق معاك عشان تغيرها؟ 

فاكر لما ادتني الفودكا على انها ميه وتفتها كلها في وشك؟؟

فاكر كل حفلاتنا وقعداتنا سوا احنا واصحابنا؟؟

فاكر ازاي لما كنت بشوفك من اول الشارع كنت بجري عليك واتشعبط فيك زي العيال ونفرج الشارع كله علينا؟؟

جنان كتير عملته بتلقائية وانا في صحبتك يا صاحبي وكانت من اسعد لحظاتي ..

فاكر يا حوده اسكندرية ياما  مشينا فيها انا وانت ومحمد وتامر؟؟

وبيتكم الدافي اللي عرفتني فيه على احلى قمرتين في الدنيا وعلى احلى ام واحلى اب في الدنيا؟؟

لما قعدنا نرسم ونلون سوا..

فاكر يا حوده الفستان الاصفر الحلو اللي جبتهولي من فرنسا هو والحلق الابيض المدور المنقوش عجبوا كل اللي شافهم وكنت دايما بقولهم محمود صاحبي جابهملي بس انا مالحقتش اقولك الكلام ده ..

فاكر لما شفتك يوم 28 يناير في ميدان طلعت حرب وكنت اول صاحب قريب اشوفه يومها و بعدها علطول اقتحمنا الميدان؟؟

فاكر كل الاوقات اللي كنت انت موجود فيها يا حوده؟اللي هي كانت من احلى الاوقات في حياتي؟؟

انا عارفة انك فاكر زي مانا فاكرة مع ان الدنيا خدتنا من بعض..

مش محتاجة البس اسود ولا لبسته عشان عارفة قد ايه بتحب الالوان وانت اصلا صديقي صاحب الضل الملون لو مش في لبسك يبقى حواليك يبقى عينك اللي كانت تلقط الالوان الحلوة في كل حته يبقى رسوماتك يبقى الحاجات الحلوة اللي كنت بتحب دايما تعملها بايدك..عشان كده هافضل طول عمري لما البس حاجة ملونة او اشوف حاجة ملونة افتكرك يا صاحبي ..

انا اسفة اني قعدت شوية من غير ما اسال عليك ولا اشوفك..هتوحشني يا صاحبي..

انا اسفة يا حودة بس كنت عارفة انه لما هييجي يوم عيد ميلادنا لازم هتكون اول حد يكلمني ويقولي كل سنة وانت  طيبة وانا ارد عليك واقولك كل سنة واحنا طيبين..

هاحتفل ازاي يا حوده بعيد ميلادي كل سنة في سنين عمري وانت مش موجود؟؟!!

من حقي امشي في الشارع

من حقي انزل من بيتنا الصبح رايقة او متضايقة وامشي في الشارع مش شايلة هم عيل اهبل سخيف او حتى لطيف هيقرر يرمي كلمة تعكنن عليه....

من حقي امشي في الشارع وانا شايلة هم الشغل او الدراسة او الفلوس او اي حاجة ومايجيش واحد  ويقرر يطلع عقد نقصه عليه بمعاكسة سخيفة او بكلمة تحرش...

من حقي امشي في الشارع وانا متحققة في حياتي المهنية والخاصة وبفكر في مستقبلي مايجيش عيل تافه يتعامل معايا على اني شئ ماشي بثير غرايزه لمجرد اني بنت...

من حقي امشي في الشارع في مسيرة او مظاهرة او في اعتصام وبطالب بحقوقي وبحقوق غيري ومابقاش بتلفت حواليه خوفا من تحرش وسط الزحمة....

من حقي امشي في الشارع وانا لابسة الوان وماحسش بالذنب او بالخوف ان الالوان هتلفت نظر حيوان معدي فيقرر ييجي يضايقني والا البس سواد في سواد وتبقى عيشتي نكد....

من حقي  امشي في الشارع من غير ما في كل خطوة اتخانق وازعق واشتم والم الناس عشان اعلم واحد الادب وتروح طاقتي واعصابي في العبث ده بدل ما تروح في حاجات مفيدة....

 من حقي امشي في الشارع وانا زهقانة وبسمع مزيكا  وسرحانة في اي حاجة تخصني من غير خوف او قلق من عربية معدية او عيل رذل....

من حقي اجوع واكل في الشارع او اشرب عصير في الشارع او اكل ايس كريم في الشارع من غير ما حد يستظرف على امي وانا رايقة ومبسوطة...

من حقي وانا ماشية في الشارع  لو واحد ضايقني او اتحرش بيه اني اطلع عين امه واوديه القسم واشتمه حتى باوسخ الالفاظ لانه ماحترمش ابسط حقوقي وهي اني امشي في الشارع في حالي...

من حقي وانا ماشية في الشارع محدش يتعامل معايا على اني شئ بفطره في رمضان او بثيره مهما كنت لابسة لاني مواطن زيي زيه وعندي نفس المشاكل اللي عنده ونفس الهموم....

من حقي وانا ماشية في الشارع مايجيش عيل بريالة مبيفهمش يتصور انه داعية او مؤمن في نفسه كده ويشتم او حتى يقولي البس حجاب او البس ازاي لان دي حاجة تخص علاقتي انا لوحدي بربي...

من حقي امشي في الشارع  في الحر ده البس حاجات خفيفة وبنص كم وقصيرة على فكرة زي ما من حقك تلبس شورت

وتيشيرتات الوان ياما تلبس جلابية سوده بكم وساعتها ممكن اعمل زيك  ....

****

من حقي ماسمعش كلام تافه بتاع:

 اصل الشباب مكبوت، لا على فكرة والبنات مكبوتين بردو واذا كان الواد يعرف يتصرف مع عاهرات فعلى فكرة البنات ماتعرفش...

اصل الشباب مش لاقي شغل وظروفه صعبة، والبنات على فكرة مابيلاقوش شغل وبيقوا مطالبين يصرفوا على نفسهم او على عيلة وبتبقى ظروفهم صعبة...

اصل البنات بردو لابسة عريان وبتثير الغرائز، بالنسبة للشورتات والقميص المفتوح للصدر والبرفانات الحلوة دي مابتثيرش غرائز البنت ولا مش من حقها!!!!!

زي ما بتتفشخ في الشغل انا بتفشخ، زي ما بتفلس انا بفلس، زي مابتتحر انا بتحر، زي ما بتتبهدل في المواصلات انا بتبهدل، بجوع وبعطش وبتعصب وبشيل الهم بدري ، مافيش حد احسن من حد ومفيش حد اقل من يبقى نحترم نفسنا وكل واحد يخليه في حاله .......

 ****

انا مش شئ انا مواطنة زيي زيك ياروح امك منك له ومش حاجة زيادة كده عشان تيجي تطلع كل عقدك وسوادك وخراك عليها ولما ادافع عن نفسي تقولي مش محترمة وده ابسط حق من حقوقي اني امشي في الشارع  واني اعيش حياتي اللي هي اصلا فيها حلوها ووحشها من غير مايبقى التحرش والمعاكسة والسخافة هو الخراء اليومي لكل بنات وستات مصر ، بس انا بدافع وهدافع عن حقوقي بكل شراسة وبكل عنف مضطرة للأسف لاني في مجتمع مش بس ذكوري  ، ذكوري غبي ومعقد ومريض..

سلحفاة مائية والطريق الى العجوزة

منازل عدة اتنقل بينها كعادتي منذ الطفولة ولكن ما لم يكن معتادا تلك العلاقة الطيبة التي تجمعني بوالدي لدرجة تجعلني في حيرة ايهما اود المكوث معه من شدة التفاهم بيننا !!!بيوت لم امر بها قط ولكن اكثرها وضوحا كان منزل نيلي "عوامة" تشبه عوامات الكيت كات ، ولي بها غرفة بشرفة واسعة تطل على النيل مباشرة دون حواجز- واحد من احلام حياتي الكثيرة ان اسكن في عوامة، العوامة لابي ومن الواضح انه كان لدينا ضيوف، بسبب اصوات النقاشات المتعالية عن الثورة في الخارج، ويبدو أيضا انني تمسكت بعالمي الموازي الذي اختبئ فيه منذ اسابيع فذهبت الى غرفتي وتحديدا الى الشرفة.....
الشمس تنتصف السماء وتعكس آشعتها زرقة في المياه الصافية بغير المعتاد أيضا ، فجأة وفي عز تشكيلاتي للألوان من حولي أرى سلحفاة مائية كبيرة تبحر على سطح النيل وكأنها "لانش"  سريع وتحاول اللحاق بها سلحفاة أخرى صغيرة بسرعة  أقل.. تابعت السلحفتين حتى وصلتا الى الشاطئ المجاور لي وإذا بهما يتحولان الى رجل في ربيع العمر وطفل صغير ينظران الي ثم يوجه الرجل سؤالا لي بلهجة ريفية  عن مكان  مستشفى  العجوزة...أقف مذهولة كالعادة ولا أرد ..

الشعب مش جاهل والبلد مش وسخة

بقالي فترة وانا عايزة اكتب في الموضوع ده...لانه بقى زيادة قوي وبقى "اووفر"....زمان لما كانت الناس بتشتم في الشعب وفي البلد بتضايق بس على الاقل بلاقي مبررات..لكن دلوقتي مش لاقية  اي مبرر لاي شخص يدعي في نفسه العظمة والافضلية عن باقي الناس عشان يشتم فيهم لانهم مابيفكروش زيه..لانهم ادوا صوتهم للاخوان..لانهم قالوا نعم في الاستفتاء!!!!!!!!!

بينسوا انه الشعب اللي بيشتموه ده قام بثورة نزل فيها حوالي 20 مليون مواطن واذا حسبنا نسبة السكان في الفئة العمرية الشبابية هنلاقي انه عشرين مليون ده عدد مش قليل خالص.. وانه الحقيقي انه في الثورة دي الشعب هو اللي خد النخبة في سكته مش العكس..
اما البلد اللي بيتقال عليها انها وسخة دلوقتي وعمرها ماهاتنضف مش عارفة ازاي مع كل هذا الحراك السياسي والاجتماعي في البلد مش قادرين الناس الشتامين دول انهم يشوفوا بارقة امل

الحاجة التانية بقى انك بصفتك نخبة كده واحسن من غيرك زي مابتقول ده قبل ما يكون ميزة هو واجب ولو شايف انه في ناس بيتم استغلالها لنقص في المعرفة فالمفروض تتوكس وتحط راسك في الارض وتسكت لانك مقصر في دورك ..اللي هو مش التوعية بالمعني الكيتش بس العمل العام اللي المفروض بتوصل فيه وبتشرك فيه كل فئات المجتمع سواء كان بقى فن ولا سياسة ولا ثقافة ولا اي حاجة ..وفي الاخر تبقى قاعد على القهوة في وسط البلد ولا في بيتك في وسط البلد بردو ولا الزمالك ولا غيرها ومتعالي على شعب محاولتش حتى قبل ما تشتمه تقدر انه لو تم استغلاله بشكل ما فده غير انه نتيجة لوكستك فده نتيجة لظروف معيشية واقتصادية وتربوية منيلة بنيلة...

انا مش كاتبة التدوينة دي من باب الوطنية او المزايدة لاني بردو ممكن في موقف من المواقف اقول بلد وسخة من باب الحمقة او شعب جاهل بردو من باب الحمقة بس مابعلنش ده في كل حتة ومبقولهوش طول الوقت

 نيجي للناس بقى اللي بيقولوا الكلام ده عمال على بطال ويقولولك انه الشعب المصري ماينفعش ينتخب ولا يبقى له صوت لانه مضحوك عليه...مين قالك انك اذكى من الشعب اللي بتتهمه بالجهل ومين قالك انك عندك الاجابة والحل لكل حاجة وهو ماعندهوش..ومين قالك انك قاري كتابين تلاتة زيادة فانت بتفهم احسن من الشخص الامي_ اللي هو بالمناسبة ممكن يبقى فاهم اكتر منك بكتير_ وبتتعامل مع نفسك على انك نخبة فبتتعالى على الناس اللي برة هذا التصنيف...مع انه الناس دول في منهم اهلك لانه مش كل النخبة اهلها نخبة بردو..ولو كان القرايب المباشرين نخبة هتلاقي قرايب بعاد مش نخبة...المهم يعني انه في الاخر ده تعالي وحتى من غير اساس يدعو للتعالي يعني ماشفتش حد بصراحة من اللي بيشتموا البلد والشعب عمال على بطال لا متميز في شخصيته التميز  "الفزيع "ولا  في انجازاته العملية او حتى الشخصية ولا عنده مشروع فشيخ ماحصلش يخليه يحس بنفسه كده على البشر فيتعالى عليهم..

بتنادوا بالعدالة والمساواة بين البشر يبقى انت بني ادم وغيرك بني ادم ومفيش حد احسن من حد مهما قريت وخدت شهادات ليكوا نفس الحقوق واهمها تقرير شكل الدولة والمجتمع اللي انتوا الاتنين عايشين فيه مع بعض..يأما تعترف انك شخص مستبد وعنصري ولا تنادي بحقوق متساوية للبشر وتريحنا وتريح نفسك وساعتها اشتم بقى براحتك..بس خليك واضح مع نفسك ومع اللي حواليك

انت مختلف عن  المجتمع..اه ، وهو في اوقات كتير مش بيتقبل اختلافك ..اه، وبيكفرك ويحاول يفرض عليك تبقى شبهه..اه ، بس انت راضي بشكل او باخر انك تعيش في المجتمع ده وقررت انك تكون مختلف فبتاخد مساحتك وبتخش معركتك في ده وبتفرض على المجتمع تقبل اختلافك ،وده مش معناه انك احسن او هو اغبى واجهل،  وبالمناسبة ده بيحصل مع اي شخص مختلف في العالم عن مجتمعه..يعني بلاش الانبهار الزيادة في النقطة دي تحديدا بالمجتمعات الغربية او غيرها لانه انبهار خيالي ومراهق..لانه نفس الناس اللي بتشتم في البلد والشعب بينبهروا طول الوقت بالمجتمعات التانية عشان احسن مننا..على فكرة خلاص ببساطة روحوا هناك وعيشوا اختلافكوا بسهولة وبدون معارك وعيشوا مع المجتمعات النضيفة اللي بتفهم وبتستحمى...وابقوا قابلوني

الفهدة العداءة كيتا

نقلب بين القنوات فلا نجد هربا من مشاهدة قناة الناشيونال جيوجرافيك والتي تعرض حلقة عن الفهدة العداءة التي تصطاد الغزلان من اجل اطعام اشبالها الصغار بينما تواجه الضباع والاسود حتى لا تفترس اطفالها وضف على ذلك حظها التعيس في ذلك اليوم ....

اقع في ازمة وجودية بين التعاطف مع الام واشبالها والذين يواجهون خطر الموت من قلة الطعام او خطر الافتراس بينما اتعاطف مع الغزلان ايضا الذين يقعون تحت تهديد الموت او يتم افتراسهم بالفعل...تنتهي الحلقة على التليفزيون فنشاهد فيلما...لكنها لا تنتهي في عقلي الباطن

اخرج من مكان يشبه المدرسة في منطقة جغرافية تشبه حي السادس من اكتوبر ،البيوت قليلة والزمان هو موعد خروج التلاميذ والموظفين، يسيرون بالشارع فالحق بهم ،بالجوار ارى اسدين يجلسان في حديقة المدرسة على بعد امتار والناس تسير بجوارهم دون اي اكتراث.يصيبني الفزع فاعدو للحاق بالزحام على جزيرة في قلب الطريق وفجأة انظر بجواري فأجد الفهدة العداءة تسير بجواري والتي علمت بأنها انثى لوجود "قصة" سوداء على جبهتها، صعقت فوقفت مكاني غير قادرة على الحراك..فكانت المفاجأة الاكبر تحدثت الي الفهدة مطمئنة بأنها صديقة وليست عدوة ثم قالت لي" هاي انا اسمي كيتا انتي اسمك ايه؟" وقعت في معضلة حسابية معقدة لقياس درجة الخطر الذي اتعرض له فكان الاختيار اما العدو ولانها سريعة فبالتأكيد ستلحق بي أو مجاراتها حتى لا تغضب مني..وكان اختيار مجاراتها هو الفائز..قلت لها" هاي كيتا...حلوة القصة بتاعتك خالص..انا اسمي هدير..وبشتغل هنا في المدرسة" فردت" اااه..ده احنا جيران بقى ..انا عايشة في جنينة المدرسة..لازم تعدي عليا وتتعرفي على العيلة" فقلت لها"طبعا..طبعا" سأفعل ذلك في الغد، لأن على الذهاب الان" قالت لي " ماشي فرصة سعيدة..وهاعملك اكلة محصلتش عالغدا" تنفست الصعداء فلقد ذهبت كيتا وفي رأسي صورة لي وأنا افترس وجبة الغذاء التي وعدتني بها وهي غزالة نيه..كدت ان اصيب بدوار من الصورة..ثم استيقظت من النوم على الفور..

احلام غير عابرة

عادة لا اتذكر الاحلام ولا استطيع تفسيرها.. ولكن بقى معي على مدار سنواتي الستة والعشرين حلمان تكررا كثيرا خاصة في مرحلة الطفولة والمراهقة.....

الاول اقف فيه في بلكونة كبيرة في بيت والدتي وتقف امامي حيّة اكبر مني وبرغم انني اخاف الحيّات والثعابين الا انني اقرر الامساك برقبتها وخبط رأسها بالحائط حتى تتهشم تماما فتموت...واجهت الحيّات كثيرا في حياتي وفي اغلب الاوقات انتصرت عليها لكن في اوقات اخرى كثيرة هزمتني تاركة اثارها على وجهي و ذراعي...

الثاني اقف فيه في مكان مجهول لكنه يشبه مدن القنال قليلا..شارع ترابي واسع يحيطه منازل ذات طابقين على جانبيه ، في منتصف الشارع يسير بجواري قطار على شريط طويل لا نهاية له...وأنا اسابق هذا القطار عدوا الى جانبه..او بمعنى أدق اطير الى جانبه، المس الارض فأطير وارتفع لارى الطابق الثاني من البيوت المجاورة..انظر داخل كل بيت واستمد منه بعض الدفء ثم اعود لألمس الارض مجددا واحلق في السماء مثل محاربين الساموراي في الافلام ..لا أشعر بالتعب مطلقا ولا تسيطر علي رغبة في تحدي القطار وتجاوزه.لكنني اسابقه...على الرغم من تكرار ذلك الحلم كثيرا الا انني لم اعلم ابدا من منا سبق الاخر


في الاحلام تكون الرائحة اكثر انعاشا
وتكون اشعة الشمس اكثر دفئا واشراقا
وتكون الالوان والاشكال اكثر جرأة ووضوحا
في الاحلام نكون احرارا

تحية لامهات اخواتنا من الشهداء

تحية ليهم من القلب، السنة دي ماجتلهمش هدية هم اللي قدموا اكبر تضحية ممكن تقديمها ولادهم ولانهم مش هيسمعوا كل سنة وانتي طيبة يا أمي ياريت كلنا نكلمهم او عالاقل نبعتلهم رسايل نواسيهم ونقولهم اننا ولادهم ومش ناسيين اخواتنا اللي استشهدوا غدر

• ماري اخت الشهيد مينا دانيال 01224651654

• والدة الشهيد خالد سعيد 01009283502

• والدة الشهيد إسلام رأفت 0128273772

• والدة الشهيد مينا نبيل 0171251262

• والدة الشهيد أحمد بسيونى 0164455070

• والدة الشهيد شهاب حسن شهاب 0178494534

• والدة الشهيد طارق مجدي مصطفى 0182640951

• والدة الشهيد خالد عطية شحاتة 0107816993

• والدة الشهيد أحمد عبد الرحيم السيد 0101101898

• والدة الشهيد ولاء الدين حسني محمد 0117674078

• والدة الشهيد أحمد اهاب محمد فؤاد عباس 0222741042

• والدة الشهيد خالد علي أحمد يوسف 0121245178

• والدة الشهيد ابراهيم رضا محمد 0161164719

• والدة الشهيد يوسف فايز ارمانيوس 0170307266

• والدة الشهيد حسين طه 0180592465 / 0177567042

• والدة الشهيد حاتم حسين محمد 0824404961

• والدة الشهيد ابراهيم سمير احمد محمد سعدون 0122995120

• والدة الشهيد مصطفى العقاد 0101974108

• والدة الشهيد جرجس لمعي موسى 0161732171

• والدة الشهيد مصطفى الصاوى 0199616141

• والدة الشهيد ابراهيم علي صالح 0146331935

• والدة الشهيد عبد الرحمن صبحي عبد الغني 0110532616

• والدة الشهيد خالد محمد محمد السيد 0126124175

• والدة الشهيد أحمد سالم عيسي محمد 0179750765 / 086- 3300218 رفح منزل

• والدة الشهيد أحمد سمير السيد 23200620 / 0127365625

• والدة الشهيد أحمد صابر مصطفي 0195594174

• والدة الشهيد أحمد عبد الرحيم السيد 0101101898

• والدة الشهيد أحمد عبد العاطي سيد 0194966039 / 0119967385

• والدة الشهيدة أميرة سمير السيد دويدار 0124942836

• والدة الشهيد محمد متولي عوض 37296357

• والدة الشهيد أحمد ابو بكر العوضي 0170224537

• والدة الشهيد مهير خليل زكي خليل 0107728262

• والدة الشهيد سعيد أحمد الطوخي 0182818921

• والدة الشهيد محمد مصطفى 0113788229

• ارملة شهيد الزاوية عم موسى 0119706832

• والدة الشهيد محمد محسن 0197433449

• والدة الشهيد د. علاء عبد الهادي 01119394242 / 0403609018

• والدة الشهيدة هدير سليمان 01006888729